कोलोराडोमा आयोजित अन्तर्राष्ट्रिय महिला दिवस कार्यक्रमको आर्थिक रिपोर्ट सार्वजनिक

कोलोराडोखबर संवाददाता , May 8th, 2024

मीन बोलखे (अमेरिका, कोलोराडो) । एनआरएनए एनसीसी अमेरिका र कोलोराडो च्याप्टरको आयोजनामा गत मार्च ९ तारिखका दिन आयोजित अन्तर्राष्ट्रिय महिला दिवसको आर्थिक रिपोर्ट सार्वजनिक गरिएको छ ।

उक्त कार्यक्रमलाई भव्यताका साथ सफल बनाउन साथ, सहयोग र सहगागिता जनाउनु हुने सम्पूर्णमा हार्दिक आभार व्यक्त गर्दै आर्थिक पारदर्शिताका लागि कार्यक्रमका सबै वित्तीय रिपोर्टहरु सार्वजनिक गरिएको एनआरएनए कोलोराडो च्याप्टरका अध्यक्ष प्रकाश पौडेलले बताउनु भयो ।

उक्त कार्यक्रमका लागि १८ हजार २ सय १० डलर सहयोग संकलन भएको थियो । कार्यक्रमलाई भव्यताका साथ सफल बनाउन विविध शीर्षकमा १२ हजार ७ सय ९२ डलर खर्च भएको छ ।

इभेन्ट डेकोरेशन, इभेन्ट इन्स्योरेन्स, इभेन्ट फोटोग्राफी, इभेन्ट सेक्युरिटी, इभेन्ट टेक्नोलोजी मिडिया साउन्ड, फुड पेमेन्ट(दरबार), सर्टिफिकेट प्रिन्टिङजस्ता शीर्षकमा खर्च भएको हो ।

संकलित सहयोग मध्ये खर्च भएर ५ हजार ४ सय १८ डलर बाँकी रहेको छ । जसमध्ये १ हजार ८ सय डलर संकलन हुन बाँकी छ । यसरी हेर्दा उक्त कार्यक्रम सम्पन्न पछि संकलित सहयोगबाट ३ हजार ६ सय १८ डलर बचत भएको छ ।

एनआरएनए एनसीसीबाट पनि कार्यक्रमका लागि भनेर केही सहयोग रकम आउने आश्वासन प्राप्त भएको छ । कार्यक्रम गरी बाँकी रहेको कूल रकम केही समयपछि एक समारोहका बीच कोलोराडो स्थित नेपाली सांस्कृतिक केन्द्र (नेपाली घर) लाई हस्तान्तरण गर्ने एनआरएनए कोलोराडोका अध्यक्ष प्रकाश पौडेलले बताउनु भयो ।