कोलोराडोखबर संवाददाता
नेपाल । अजेडिन औनाहीको उत्कृष्ट दुई गोल र सौफियाने राहीमीको इन्जुरी समयको गोलको मद्दतले मोरक्को फिफा विश्वकप २०२६ को क्वाटरफाइनलमा प्रवेश गरेको छ।
ह्युस्टनमा भएको अन्तिम १६ को खेलमा सह–आयोजक क्यानडालाई ३–० ले स्तब्ध पार्दै मोरक्कोले लगातार दोस्रो पटक विश्वकपको अन्तिम आठमा आफ्नो स्थान सुरक्षित गरेको हो।
सन् २०२२ को कतार विश्वकपमा सेमिफाइनल पुगेर इतिहास रचेको मोरक्कोले अब जुलाई ९ मा बोस्टनमा हुने क्वाटरफाइनल खेलमा फ्रान्सको सामना गर्नेछ। अर्कोतर्फ, यस विश्वकपअघि कहिल्यै पनि विश्वकप खेल नजितेको क्यानडाका लागि हार पीडादायी रहे पनि अन्तिम १६ सम्मको यात्रा गर्व गर्नलायक रह्यो
खेलको पहिलो हाफमा घरेलु टोली क्यानडाले राम्रो सुरुवात गरेको थियो। उच्च उर्जा र दबाबका साथ खेलेको क्यानडाले सुरुवातमै केही कर्नरहरू प्राप्त गर्यो।
मोरक्कोको डिफेन्सको गल्तीको फाइदा उठाउँदै अली अहमदको पासमा तानी ओलुवासेयीले उत्कृष्ट अवसर पाएका थिए। तर, क्यानडामा नै जन्मिएका मोरक्कोका गोलकिपर यासिन बोनोले बायाँ खुट्टाले उत्कृष्ट बचाउ गर्दै क्यानडालाई अग्रता लिन दिएनन्।
खेलको २२औं मिनेटमै मोरक्कोका लागि यस प्रतियोगिताका सर्वाधिक गोलकर्ता इस्माएल साइबारी चोटका कारण मैदानबाट बाहिरिनु परेपछि मोरक्को थप दबाबमा परेको थियो। उनको स्थानमा सौफियाने राहीमी मैदान प्रवेश गरेका थिए।
पहिलो हाफमा आफ्नो लय समात्न संघर्ष गरेको मोरक्कोले दोस्रो हाफमा भने उत्कृष्ट प्रदर्शन गर्यो। खेलको ५०औं मिनेटमा फ्रिकिक रणनीतिअनुसार अस्रफ हाकिमीको पासमा डिबक्सको बाहिरबाट अजेडिन औनाहीले उत्कृष्ट फर्स्टटाइम प्रहार गर्दै मोरक्कोलाई १–० को अग्रता दिलाए।
क्यानडाका ताजोन बुकाननले गोल गर्ने प्रयास गरे पनि मोरक्कोका गोलकिपर बोनोले त्यसलाई असफल पारिदिए। खेलको ८२औं मिनेटमा ब्राहिम डियाजको पासमा काउन्टर अट्याकमार्फत औनाहीले व्यक्तिगत दोस्रो गोल गर्दै मोरक्कोको जित सुनिश्चित गरे। विश्वकप इतिहासमा सन् २००२ मा सेनेगलका हेन्री कमरापछि नकआउट चरणमा दुई गोल गर्ने औनाही पहिलो अफ्रिकी खेलाडी बनेका छन्।
खेलको इन्जुरी समय (९०.८ मिनेट) मा डियाजकै थ्रुबललाई नियन्त्रणमा लिँदै सौफियाने राहीमीले चलाखीपूर्ण गोल गरेपछि मोरक्कोले ३–० को सहज जित दर्ता गर्यो। मोरक्कोले औनाहीले गोल गरेका अहिलेसम्मका सबै ८ खेलमा जित निकाल्ने आफ्नो रेकर्डलाई पनि कायम राखेको छ।
प्रतिक्रिया दिनुहोस्