ट्युनिसियामा डुङ्गा दुर्घटना हुँदा १२ जनाको मृत्यु

नेपाल । ट्युनिसियाको दक्षिण-पूर्वी तट नजिकै १५ जना आप्रवासी बोकेको एउटा डुङ्गा दुर्घटना हुँदा कम्तीमा १२ जनाको मृत्यु भएको छ भने २ जना अझै बेपत्ता छन्। घटनापछि आक्रोशित स्थानीयले बेन गुएर्दने सहरमा हिंसात्मक प्रदर्शन सुरु गरेका छन्।

इटालीतर्फ जाँदै गरेको उक्त डुङ्गा जारजिस र बेन गुएर्दने बीचको तटीय क्षेत्रबाट प्रस्थान गरेलगत्तै समुद्रमा डुबेको थियो। राष्ट्रिय गार्डका अनुसार डुङ्गामा सवार अधिकांश युवाहरू थिए, जसमा १४ जना बेन गुएर्दने र एक जना जारजिसका थिए।

दुर्घटनामा परेका मध्ये केवल एक जनाको जीवितै उद्धार गरिएको छ। उनी करिब ४८ घण्टासम्म समुद्रमा तैरिएपछि एक व्यावसायिक जहाजले उद्धार गरेको थियो।

ट्युनिसियाली मानव अधिकार अब्जर्भेटरीका प्रमुख मोस्तफा अब्देलकेबिरका अनुसार मृतकमध्ये एउटै परिवारका सात जना सदस्य रहेका छन्।

यस दुखद घटनापछि बेन गुएर्दने सहरमाआक्रोश र शोक छाएको छ। प्रदर्शनकारीहरूले टायर बालेर सडक अवरुद्ध पारेका छन् भने भीडलाई तितरबितर पार्न प्रहरीले अश्रुग्यास प्रहार गरेको छ।

स्थानीय युवाहरूले देशमा व्याप्त आर्थिक सङ्कट, बेरोजगारी र सरकारी उपेक्षाका कारण जोखिमपूर्ण जलयात्रा रोज्न बाध्य भएको भन्दै आर्थिक विकास र रोजगारीको माग गरेका छन्।

संसद् सदस्य इमाद औलाद जिब्रिलले यस घटनालाई “माटोको सास्तीबाट भाग्न खोज्दा समुद्रमा बगेका युवाहरूको राष्ट्रिय त्रासदी” भन्दै टिप्पणी गरेका छन्।

ट्युनिसियाको दक्षिण-पूर्वी तट इटालीको लाम्पेदुसा टापुबाट करिब १४५ किलोमिटर मात्र टाढा रहेकाले यो क्षेत्र युरोप छिर्ने मुख्य र जोखिमपूर्ण मार्ग बन्दै आएको छ। अन्तर्राष्ट्रिय प्रवासन सङ्गठन (IOM) का अनुसार मध्य भूमध्यसागरीय क्षेत्र विश्वकै सबैभन्दा घातक आप्रवासी मार्ग मानिन्छ।