नगेन्द्र न्यौपानेको उपन्यास ‘दरबारको कानुन’ लोकार्पण

नेपाल । उपन्यासकार नगेन्द्र न्यौपानेको उपन्यास ‘दरबारको कानुन’ लोकार्पण गरिएको छ ।

काठमाडौँमा शुक्रबार एक कार्यक्रमबिच साहित्यकार प्राध्यापक पुरुषोत्तम दाहालको अध्यक्षता र प्राडा शैलेन्दुप्रकाश नेपालको प्रमुख आतिथ्यमा उक्त उपन्यासको लोकार्पण गरिएको हो । कार्यक्रमका प्रमुख अतिथि शैलेन्दुप्रकाश नेपालले नमिता–सुमिता काण्डको विषयमा आफूले धेरै पहिले कविता लेखेको स्मरण गर्दै दुई लाइन कविता सुनाउनुभएको थियो भने अहिले उक्त काण्डलाई प्लट बनाएर उपन्यास नै बजारमा आउनु चानचुने कुरा नभएको बताउनुभयो ।

कार्यक्रमका सभापति साहित्यकार प्राध्यापक पुरुषोत्तम दाहालले आफू पत्रकारिता पेसामा भएका कारण उक्त घटनाका विषयमा आफूले तात्कालीन समयमा धेरै नै समाचार प्रकाशित गरेको कुरा स्मरण गर्नुभयो । प्रा। दाहालले शक्तिको आडमा अहिले पनि त्यस्ता घटना भइरहेको कुरा जानकारी गराउँदै त्यस्ता घटनाका उदाहरणसमेत प्रस्तुत गर्नुभएको थियो ।

समीक्षक डा. अम्बिका अर्यालले गल्ती गर्नेले छाती फुकाएर हिँडेको र गल्ती नगर्नेले यातना खेपिरहेको तितो यथार्थ उपन्यासमा समेटिएको बताउनुभयो । त्यस्तै डा। यज्ञेश्वर निरौलाले नमिता–सुमिता काण्डमा आधारित उपन्यासमा मान्छेको क्रूरताको चित्रण गरिएको बताउनुभयो । त्यस्तै साहित्यिक पत्रकार सङ्घका अध्यक्ष राधेश्याम लेकालीले डायास्पोरिक स्रष्टाले नेपाली साहित्यको समृद्धिका लागि उल्लेख्य भूमिका निर्वाह गरेको धारणा व्यक्त गर्नुभयो ।

कार्यक्रममा साहित्यकार लेखनाथ पोखरेल, डा. बुनु दाहाल, चलचित्र विकास बोर्डका सदस्य गणेश सुवेदी, अग्रज पत्रकार सानुकाजी श्रेष्ठ, प्रकाशक यज्ञ न्यौपाने, नारायण नेपाललगायतको उपस्थिति रहेको थियो । ब्रदर बुक्स प्रकाशन प्रालिले प्रकाशनमा ल्याएको उपन्यासमा बद्री अधिकारीको डिजाइन र आवृत्ति छापाखानाको मुद्रण रहेको छ ।