कोलोराडोखबर संवाददाता
नेपाल । नेपाल कम्युनिष्ट पार्टी (एमाले) को स्थायी कमिटीको बैठकले विभिन्न जिल्लाका १३ जना नेतालाई केन्द्रीय कमिटी सदस्यमा मनोनयन गर्ने निर्णय गरेको छ। पार्टी अध्यक्ष केपी शर्मा ओलीको अध्यक्षतामा शनिबार सम्पन्न बैठकले सो मनोनयन गरेको हो।
महासचिव शङ्कर पोखरेलद्वारा जारी विज्ञप्तिअनुसार मनोनीत हुनेहरूमा सिर्जना राई (भोजपुर), सावित्रा अर्याल (रुपन्देही), इन्दु कडरिया विष्ट (कञ्चनपुर), सीता पङ्गेनी (नवलपुर), सीता अधिकारी (पाल्पा), डा. पुष्पा केसी भण्डारी (कास्की), धर्मनाथप्रसाद साह (सिरहा), तेजमान कन्दङवा (तेह्रथुम), टङ्क आङ्बोहाङ (ताप्लेजुङ), नवीन रोक्का (रोल्पा), मीनप्रसाद गुरुङ (स्याङ्जा), डबल पाण्डे (दोलखा) र तेजेन्द्र केसी (रुपन्देही) रहेका छन्।
असोज २२ गतेदेखि सुरु भई शनिबार सकिएको स्थायी कमिटी बैठकले आगामी मङ्सिर पहिलो साता राष्ट्रिय भेला आयोजना गर्ने निर्णय गरेको छ। राष्ट्रिय भेलामा प्रदेश कमिटीका पदाधिकारी, जिल्ला कमिटीका पदाधिकारी, पालिका कमिटीका अध्यक्ष तथा उपाध्यक्ष र सबै तहका जनप्रतिनिधिहरूको सहभागिता रहने एमालेले जनाएको छ।
यसैगरी बैठकले पार्टीको साङ्गठनिक अधिवेशनको कार्यतालिका तय गर्दै वडा कमिटीका अधिवेशनहरू आगामी मङ्सिर २६ गते र गाउँपालिका तथा नगरपालिकास्तरीय कमिटीका अधिवेशनहरू पुस ४ गते सम्पन्न गर्ने निर्णय गरेको छ।
बैठकको आरम्भमा पार्टीको केन्द्रीय कमिटीको तेस्रो बैठकबाट वरिष्ठ नेतामा मनोनीत भएकी पूर्वराष्ट्रपति विद्यादेवी भण्डारीले पद तथा गोपनीयताको शपथ ग्रहण गरेकी थिइन्।
बैठकले मधेस प्रदेशसभामा पार्टीका सभासद् जैनब खातुनको निधनपछि रिक्त रहेको समानुपातिकतर्फको स्थानमा नाजिमा खातुनलाई मनोनयन गरी आवश्यक प्रक्रियाका लागि निर्वाचन आयोगमा सिफारिस गर्ने निर्णयसमेत गरेको छ।
त्यसैगरी, जिल्ला अध्यक्ष पद रिक्त रहेका १३ जिल्लामा सम्बन्धित जिल्ला तहकै निर्णयबाट अध्यक्ष तोकी आयोजक समिति/सङ्गठन कमिटीमा रूपान्तरण गर्ने र त्यसको अनुमोदनका लागि माथिल्लो कमिटीमा पठाउने निर्णय बैठकले गरेको जारी विज्ञप्तिमा उल्लेख छ।
प्रतिक्रिया दिनुहोस्