बालकविता:चौताराको बाघ

– रमेशचन्द्र घिमिरे-

भाइले थाहा पाएछ
बाघले बाख्रा खाएछ

देख्यौ तिम्ले वनमा ?
पारि सिम्ले वनमा
कताबाट आएछ ?
कति बेला खाएछ ?

हैन त्यसो हैन रे !
सिम्लेमा बाघ छैन रे !
चौतारामा आएछ
छानी-छानी खाएछ

चौतारामा के आउँथ्यो ?
बाख्रा वनमै पाउँथ्यो
मौका छोप्न भ्याएछ
झ्याप्प-झुप्प खाएछ

बाघ जम्मा चारोटा
बाख्राभन्दा क्यै मोटा
खबर यस्तो ल्याएछ
दुब्ला बाख्रा खाएछ

छपनीमा बसेर
ढुक्कै पन्था कसेर
आफूले जुन चाहेछ
मिलाई-मिलाई खाएछ

बाबासँग सोधियो
ढुङ्गो रै´छ बुझियो
त्यस्सै गफ लाएछ
बाघले बाख्रा खाएछ ।

बाघ पनि ढुङ्गाकै
बाख्रा पनि ढुङ्गाकै
बल्ल ढुक्क भएँ म
अब खेल्न गएँ म !
°°°°°
-भोर्लेटार, लमजुङ ।