कोलोराडोखबर संवाददाता
नेपाल । नेपाली डकुमेन्ट्री फिल्म ‘द एभरेस्ट ड्रीम’ ले भारतको शिम्लामा आयोजित १२ औँ अन्तर्राष्ट्रिय फिल्म फेस्टिभल अफ शिम्लामा स्पेशल जुरी सर्ट डकुमेन्ट्री अवार्ड जितेको छ।
निर्देशक तथा संचारकर्मी गणेश पाण्डेले निर्देशन तथा निर्माण गरेको ‘द एभरेस्ट ड्रीम’ ले विश्वभरका अन्तर्राष्ट्रिय वृत्तचित्रबिच प्रतिस्पर्धा गर्दै यो अवार्ड हात पारेको हो । शिम्लामा आयोजित अवार्ड समारोहमा हिमाञ्चल प्रदेशका गभर्नर कविन्दर गुप्ता र फेस्टिभल निर्देशक पुष्पराज ठाकुरले पाण्डेलाई अवार्ड हस्तान्तरण गर्नुभयो ।
सेप्टेम्बर २५ देखि २७ सम्म शिम्लाको ऐतिहासिक गेती हेरिटेज कम्प्लेक्समा आयोजना भएको महोत्सवमा ३३ देशका फिल्म प्रदर्शन गरिएका थिए । मस्तिष्कमा गम्भीर चोट लागेपछि जीवनमा अनेक चुनौती सामना गरिरहेका बेलायती नागरिकहरूको एभरेस्ट बेस क्याम्पसम्मको साहसिक यात्राको कथा ‘द एभरेस्ट ड्रीम’ मा प्रस्तुत गरिएको छ। स्कटल्याण्डबाट सुरु भएको उनीहरूको कठिन प्रशिक्षणदेखि नेपाल आएर हिमालयको यात्रासम्मको अनुभवलाई वृत्तचित्रले समेटेको छ।
जेम्स लेम्बको नेतृत्वमा पाँचजना ब्रेन इन्जुरी सर्वाइवर्ससहित सात सदस्यीय टोलीले एभरेस्ट बेस क्याम्पसम्म गरेको यात्रालाई फिल्मले केन्द्रमा राखेको छ। शारीरिक तथा मानसिक चुनौतीका बाबजुद सपना पूरा गर्न सकिन्छ भन्ने प्रेरणादायी सन्देश फिल्मले दिएको छ। निर्देशक पाण्डेका अनुसार, फिल्मको मुख्य सन्देश ‘जीवनमा गम्भीर चोट वा कठिनाइ आए पनि मानिसले नयाँ सपना देख्न र ती सपना पूरा गर्न सक्छ’ भन्ने छ ।
‘द एभरेस्ट ड्रीम’ ले यसअघि अमेरिकाको जर्जियास्थित कब अन्तर्राष्ट्रिय फिल्म महोत्सवमा पनि उत्कृष्ट डकुमेन्ट्री फिल्म अवार्ड जितिसकेको छ। शिम्लामा प्राप्त यो अन्तर्राष्ट्रिय अवार्डसँगै नेपाली डकुमेन्ट्रीले अन्तर्राष्ट्रिय फिल्म महोत्सवहरूमा आफ्नो उपस्थिति थप बलियो बनाएको छ।
प्रतिक्रिया दिनुहोस्