कोलोराडोमा नेपाली घरलाई व्यवस्थितरूपमा संचालन गर्न सामुदायिक सहकार्य परिषद गठन

-नातिबाबु भट्ट (कोलोराडो अमेरिका) । कोलोराडोवासी नेपालीभाषी सामाजिक संघ संस्थाहरुको आर्थिक र भौतिक योगदानबाट निर्माणाधीन नेपाली सांस्कृतिक केन्द्रलाई व्यवस्थितरूपमा संचालनगर्न सामुदायिक सहकार्य परिषद गठन गरिएको छ ।

नेपालीभाषी समुदाय र सामाजिक संघ संस्थाबीच समन्वय संगसंगै कार्यगत एकताबाट निर्माण भैरहको नेपाली सांस्कृतिक केन्द्र (नेपाली घर) लाई सामुहिक प्रयत्नबाट संचालनका लागी सामुदायिक सहकार्य परिषद गठन गरिएको हो ।

नेपालीभाषा संस्कृतिको जगेर्ना गर्दै पुस्तान्तरण गर्न, नेपाली समाजलाई अमेरिकी प्रणालीसँग परिचित गराउंदै मूल अमेरिकी समाजमा चिनाउन, विविध चाडपर्व कार्यक्रमहरू संचालन गर्न स्थापित नेपाली सांस्कृतिक केन्द्र (नेपाली घर) सबैको साझा सम्पत्ती हो । यसप्रति नेपाली समुदायको अपनत्वको भाबना जागृत गराउदै वित्तीय रूपमा समेत दीगो तरिकाले संचालन गर्नुपर्ने वास्तविकतालाइ आत्मासाथ गर्दै नेपालीभाषी समुदाय संगको पटक पटकको अन्तरकृया र सुझावलाइ मनन गरी नेपाली घरको संशोधित विधानको दफा ८ बमोजिम सामुदायिक सहकार्य सल्लाहाकार परिषद गठन गरिएको हो ।

परिषदमा नेपाली सांस्कृतिक केन्द्र निर्माणका लागि आर्थिक सहयोग गरेका दाताहरु, विविध पेशा र व्यवसायमा संलग्न व्यक्तिहरू, स्थानीय विषय विज्ञ तथा बुद्धिजीवीहरू र औपचारिक एवं सकृय रुपमा कोलोराडोमा सेवारत गैरनाफामूलक सामाजिक संघसंस्थाहरूको सहभागिता रहने प्राबधान छ । सोही अनुसार व्यापक प्रतिनिधित्व हुनेगरी एकै पटकमा परिषद गठनगर्न व्यावहारिक र समयको कारणले कठिनाई परेकाले परिषद पूर्णताको कार्यलाई क्रमिक र चरणबद्ध रूपमा संपन्न गर्ने गरि प्रथम चरणमा समाजसेवी डा. विजयराज शर्माको संयोजकत्वमा कोर समुह गठन गरिएको हो ।

यसरी गठित कोर समुहका अन्य सदस्यहरूमा सामाजिक अभियान्ताहरू रामप्रसाद श्रेष्ठ, नारायण श्रेष्ठ, नवीन दत्त, डा. संगीता श्रोत्रिय, पदम विश्वकर्मा, पुरुषोत्तम पाण्डे, मणी दहाल, रोहिणीकुमार शर्मा, टीका सिटौला, सुनिल पाठक, दिनेश भट्टराई, डा. आनन्द पौडेल, योगराज गौतम, लछुमन राना र जगदिशचन्द्र ढकाल सदस्य सचिब रहेको सामुदायिक सहकार्य परिषद कोर समूह गठन गरिएको नेपाली घरका निवर्तमान अध्यक्ष जगदिशचन्द्र ढकालले बताएका छन् ।

परिषदलाई क्रमिक रुपमा विस्तार गर्दै सामुदायिक सहकार्य परिषद गठनलाई पूर्णता दिने सर्वाधिकारपनि कोर समूहमा रहेको छ । सोही मुताबिक सामुदायिक सहकार्य परिषद कोर समूहले कोलोराडोमा सकृय सामाजिक संघ संस्थाहरूलाइ परिषदमा सहभागिताकोलागी यही अगष्ट १७ तारिक आइतबार दिउँसो २ बजे नेपाली सांस्कृतिक केन्द्र नेपाली घरमा बृहत बैठकको आयोजना गरेको निवर्तमान अध्यक्ष ढकालले बताएका छन् ।