कोलोराडोखबर संवाददाता
नेपाल । लुम्बिनी लायन्सले नेपाल प्रिमियर लिग (एनपिएल) मा विजयी सुरुवात गरेको छ ।
कीर्तिपुरस्थित त्रिवि अन्तर्राष्ट्रिय क्रिकेट स्टेडियममा बिहीबार साँझ भएको खेलमा लुम्बिनीले चितवन राइनोजलाई ६ विकेटले हरायो ।
जितका लागि एक सय ४३ रनको मध्यम लक्ष्य पछ्याएको लुम्बिनीले १८.३ ओभरमा चार विकेटको क्षतिमा एक सय ४६ रन जोड्दै लक्ष्य पूरा गरेको हो । लुम्बिनीका लागि गुलवदिन नैवले सर्वाधिक ४४ रन बनाउनुभयो ।
२४ बलमा तीन चौका तीन छक्का हान्नुभएका गुलवदिन अविजित रहनुभयो । कप्तान रोहित पौडेलले ३९ रन बनाउनुभयो । उहाँले ४४ बलमा एक चौका हान्नुभएको थियो ।
यस्तै ओपनर सन्दीप जोराले २८, डार्की सर्टले ११ र दीलिप नाथले १० रन बनाउनुभयो । बलिङमा चितवनका रिजन ढकालले दुई तथा सोहिल तन्विरले एक विकेट लिनुभयो ।
यसअघि टस हारेर पहिले ब्याटिङको निम्तो पाएको चितवनले निर्धारित २० ओभरमा सात विकेटको क्षतिमा एक सय ४२ रन बनाएको थियो ।
चितवनका लागि रवि बोपराले अर्धसतकीय पालि खेल्नुभयो । सर्वाधिक ६६ रन बनाउनुभएका वोपराले ५५ बलमा चार चौका र तीन छक्का हान्नुभयो ।
यस्तै कप्तान कुशल मल्लले २१, सैफ जैइफले १५, देव खनालले १४, ओपनर दीपक बोहराले १० र अर्जुन साउदले अविजित आठ रन बनाउनुभयो ।
बलिङमा लुम्बिनीका रुवेन ट्रम्पलम्यानले तीन विकेट लिनुभयो । लुम्बिनीका रुवेन प्लेयर अफ दि म्याच हुनुभयो । यस्तै अविशेष गौतम र गुलवादिन नैवले दुई दुई विकेट लिनुभयो ।
एनपिएलमा पहिलो जितसँगै लुम्बिनीले दुई अङ्क बनाएको छ । दोस्रो खेलमा पहिलो हार खेपेको चितवनको पनि दुई अङ्क छ ।
यसअघि आफ्नो पहिलो खेलमा चितवनले कर्णालीलाई चार विकेटले हराएको थियो ।
एनपिएल अन्तर्गत शुक्रबार पोखरा एभेन्जर्स र सुदूरपश्चिम रोयल्सबीच साँझ ४ः०० बजे प्रतिस्पर्धा हुनेछ ।
प्रतिक्रिया दिनुहोस्