कोलोराडोखबर संवाददाता
नेपाल । युवा साहित्यकार शम्भु राईको कविता संग्रह ‘आदर्श पहाड’ को शनिबार राजधानीमा सार्वजनिक गरिएको छ । अमेरिकाको न्यूयोर्कमा बसिरहनु भएका कवि राईको यो पहिलो कृति हो ।
नेपाल प्रज्ञा प्रतिष्ठाका कुलपति भुपाल राई, प्राज्ञ श्रवण मुकारूङ तथा कविका आफन्तहरूले संयुक्त रूपमा पुस्तक सार्वजनिक गर्नुभयो ।
कार्यक्रममा बोल्दै कुलपति राईले संग्रहमा समेटिएका कविताहरुमा पहाडका जनजिवन र सौन्दर्य चेत भेटिने बताउनुभयो । परदेशबाट देश सम्झनु भनेको सत्ता चेत ब्युँझाउनुसमेत भएको धारणा व्यक्त गर्दै उहाँले कविमा त्यो चेतना देखिने बताउनुभयो ।
प्राज्ञ श्रवण मुकारुङले करिब ४० दशकको आफ्नो कविता यात्रा र नेपाली कविहरुको प्रवृत्तिबारे ब्याख्या गर्दै पुस्तकमा समेटिएको कविताहरु विचार र सिल्पले खारिएको टिप्पणी गर्नुभयो । विश्वभर मुक्त छन्दमा लेखिएका कविता लाखौँ रहेको उल्लेख गर्दै उहाँले संग्रहमा समेटिएका कविताहरुले पनि उन्मुक्त ढंगले आफ्नो विचार प्रवाहित गरेको बताउनुभयो ।
भाषाविद एवं समालोचक उपप्राध्यापक डा. तारामणि राईले कविताहरूमा आदिवासी ज्ञान र सिपलाई निक्कै महत्वका साथ प्रस्तुत गरिएको छ । कवि तथा अनुवादक रिमा केसीले परदेशमा रहेर लेखिएका कविताहरुमा आफ्नो माटो, गाऊँ र ठाऊँप्रतिको सुगन्ध भेटिने बताउनुभयो ।
विदेशमा ब्यस्त जीवनका वाबजुद यति मीठो कविता सिर्जना हुनु र कविताप्रतिमाया हुनु आफैँमा सुन्दर पक्ष भएको व्याख्या गर्दै उहाँले कविता सरल, छोटा र मीठा रहेको धारणा व्यक्त गर्नुभयो ।
प्रतिक्रिया दिनुहोस्