कविता: सुशासन

-आर. आर. चौलागाईं-
तिमी नभए पनि
घाम उदाउँछ
तिमी नभए पनि
जून झुल्किन्छ
तिमी नभए पनि
ताराहरू चम्किन्छन्
नदीहरू बग्छन्
फूलहरू फुल्छन्
हावा चल्छ
पानी पर्छ
चराहरू उड्छन्
भालेहरू बास्छन्
तिमी नभए पनि ।

तिमी नभए पनि
मौरीले मह बनाउँछ
तिमी नभए पनि
श्रमिकहरू काममा खट्छन्
तिमी नभए पनि
किसानहरू खेतमा जान्छन्
सवारी साधनहरू गुड्छन्
बत्तिहरू बल्छन्
पृथ्वी घुम्छ
कुकुर भुक्छ
बालीहरू पाक्छन्
पसलहरू खुल्छन्
तिमी नभए पनि ।

तिमी हुनु र नहुनुमा
मलाई केही फरक पर्दैन
तर तिमी हुँदा
मलाई एउटै कुरा चाहिन्छ
त्यो हो सुशासन
जो अहिलेसम्म मैले देख्न पाएको छैन ।

हेटौंडा, मकवानपुर ।