कोलोराडोखबर संवाददाता
कोलोराडो । गोपालय यू.एस.ए. र गोपाल योञ्जन फाउन्डेशन नेपालले, कोलोराडो नेपालीज कम्युनिटी र नेपाली जात्रा संस्थासँग सहकार्य गर्दै, नेपाली सांगीतिक आकाशका नक्षेत्र स्व. गोपाल योञ्जन (२०००–२०५३) प्रति समर्पित पुस्तक विमोचन तथा गोपाल योञ्जनका विविध रचनाका झलकहरूको कार्यक्रम डेनभरस्थित Spur, Colorado State University मा आयोजना भएको छ । यस प्रकारको कुनै नेपाली प्रबुध्द् सांगीतिक व्यक्तित्वमाथि प्रकाशन भएको यो पहिलो अंग्रेजी कफि टेबल पुस्तक हुन पुगेको छ ।
कार्यक्रमको शुरूवात कोलोराडो स्टेटका तर्फबाट, डा. सुजान ई. जल्बर्टको स्वागत मन्तव्यबाट भयो । त्यसपछि गोपालया यूएसएकी निर्देशक श्रीजना सिंह योञ्जनले गोपालय र गोपाल योञ्जन फाउन्डेशन नेपालको उद्देश्यबारे जानकारी दिइन् । उपस्थित दर्शकहरूले ‘हर नाद’ शीर्षकको योञ्जनप्रति समर्पित म्युजिक भिडियोको कलात्मक अनुभूति पछि पुस्तकका लेखिका, गोपाल योञ्जनकी पत्नी श्रीमती रेन्छिन योञ्जनले गोपाल आफ्नो जीवनयात्रा र संगीत, दर्शन र सामाजिक चिन्तनमा गोपाल योञ्जनको योगदानबारे भावनात्मक प्रस्तुति दिइन् । यसै क्रममा उनले अत्यन्त प्रतिक्षित पुस्तक “Gopal Yonjan: The Man & His Music” को विमोचन उर्मिला श्रेष्ठ, हिरण्य भोजपुरे र डा. सुजान जल्बर्टसँगै गरिन् ।
कार्यक्रममा कोलोराडोका कलाकारहरूले गोपाल योञ्जनका केही रचनाहरू प्रस्तुत गरे । प्रस्तुतिहरू पुस्तकका अंश, भिडियो तथा प्रसङ्गीय टिप्पणीहरूसँग संयोजित थिए, जसले योञ्जनको दार्शनिक गहिराइ, नारीवादी आवाज, लोक तथा समकालीन नेपाली संगीतमा उनले गरेका नवीन प्रयोगलाई उजागर गर्यो । कार्यक्रममा सहभागी धेरैले पुस्तक किन्दै योञ्जनको धरोहर आफ्ना घरसम्म पुग्नेबारे उत्साहित देखिन्थे ।
कार्यक्रमको समापनमा रेन्छिन योञ्जनले विगत र गोपाल योञ्जन फाउन्डेशनको भविष्य दृष्टिकोणबारे मन्तव्य दिइन् । त्यसपछि श्रीजना सिंह योञ्जनले सहभागी कलाकारहरूको परिचय गराउँदै अमेरिकाभर हुने पुस्तक यात्राका आगामी योजनाहरू सार्वजनिक गरिन् ।
सह–आयोजक कोलोराडो नेपालीज कम्युनिटीकी संस्थापक तथा CEO बिनिशा श्रेष्ठले विशेष धन्यवाद ज्ञापन गर्दै यस्ता कार्यक्रमहरूले नेपाली कला, संगीत र सम्पदाको समृद्धि कोलोराडोमा प्रस्तुत गर्न मात्र नभई पुस्तान्तरबीच सांस्कृतिक सम्बन्धलाई अझ प्रगाढ बनाउने बताइन् ।
प्रतिक्रिया दिनुहोस्