कोलोराडोखबर संवाददाता
नेपाल । नेपाली शिक्षा परिषद्ले राष्ट्रिय विभूति युवाकवि मोतीराम भट्टको १६०औँ जयन्ती मनाएको छ ।
शनिबार काठमाडौंमा आयोजित कार्यक्रममा परिषद्ले दिवंगत कवि लेखकहरूको सामूहिक जयन्ती, समस्यापूर्ति कवि सम्मेलन आयोजन गर्नुकासाथै राष्ट्रिय युवा सेवा कोषद्वारा स्थापित ‘युवावर्ष मोती पुरस्कार’ समेत प्रदान गरेको छ ।
कार्यक्रमका प्रमुख अतिथि अग्रज साहित्यकार मुकुन्दशरण उपाध्यायलगायतले युवा साहित्यकार छन्दमणि त्रिपाठीलाई ‘युवावर्ष मोती पुरस्कार’ प्रदान गरे ।
प्रमुख अतिथि उपाध्यायले नेपाली शिक्षा परिषद्का संस्थापक गोपाल पाँडे असीमले सुरु गरेको यस संस्थामा आफू पहिले पनि सहभागी भएको स्मरण गर्दै संस्थाले गर्दै आएको कामको प्रशंसा गरे ।
उक्त अवसरमा साहित्यकार ज्ञाननिष्ठ ज्ञवालीद्वारा लिखित ‘बा, आमा र म’ कृति पनि लोकार्पण गरियो । कार्यक्रममा साहित्यकार कोषराज न्यौपानेले गतवर्ष मोती जयन्तीपछि दिवंगत भएका सर्जकहरूकाबारेमा चर्चा गरे ।
उक्त अवसरमा साहित्यकार कोमलप्रसाद पोखरेलबाट प्राप्त भएको ‘फर्कन्छु आफ्नै घर’ समस्यामा समस्यापूर्ति कवि सम्मेलन गरियो । कवि सम्मेलनमा कविहरू शिवगोपाल रिसाल, मुकुन्द शर्मा चालिसे, रमेश खकुरेल, श्रीहरि फुयाँलसहित तीन दर्जन बढी कविहरूले आफ्ना रचना प्रस्तुत गरे ।
उक्त अवसरमा परिषद्का अध्यक्ष रमा शर्मासहित डा. विष्णु भण्डारी लगायतले बोलेको परिषद्ले जनाएको छ ।
प्रतिक्रिया दिनुहोस्