कोलोराडोखबर संवाददाता
कोलोराडो । अन्तर्राष्ट्रिय नेपाली साहित्य समाज (अनेसास) कोलोराडो शाखाबाट सञ्चालित नेपाली भाषा पाठशालामध्ये नर्थग्लेनको पाठशालामा यस सत्रमा पढ्ने बालबालिकाहरूका लागि दीक्षान्तसमारोह वेस्टमिन्स्टरस्थित नेपाली घरमा अगस्त २३ शनिवारका दिन हर्षोल्लासका साथ सम्पन्न भएको छ ।
अनौपचारिक तवरले सञ्चालित यस कार्यक्रमको प्रारम्भ पाठशालाका बालबालिकाहरूले सामूहिक राष्ट्रिय गानबाट गरेका थिए । अनेसास कोलोराडो शाखाका महासचिव पुष्पराज पौडेलले सञ्चालन गर्नुभएको यस कार्यक्रममा दीक्षित विद्यार्थी रचित रेग्मीबाट हनुमान चालिसा कण्ठस्थ पाठ गरिएको थियो । समारोहमा समृद्धि खड्का, सिमरन सुवेदी, सृष्टि खड्का लगायतले विधार्थी गान र नृत्य प्रस्तुत गरेका थिए ।
यसैगरी ठूलो, मध्यम तथा सानो कक्षाका विद्यार्थीहरूले पालैपालो कक्षागत रूपमा तयार पारिएको सामूहिक गीत तथा कविता वाचन गरेका थिए । यसलगत्तै खुशी र एञ्जल पौडेल दिदीबहिनीले सुन्दर नृत्य प्रदर्शन गरेका थिए । माया ज्ञवालीले पियानो बजाएर उत्कष्ट कलाको परिचय दिएकी थिइन् । रसिल रेग्मीले सरस्वती बन्दना कण्ठस्थ सुनाएर विद्याकी देवी सरस्वतीप्रतिको भक्तिभाव दर्शाएका थिए ।
यसरी विद्यार्थीहरूले आ–आफ्ना प्रतिभा प्रदर्शन गरेर अभिभावक, गुरु, गुरुमा तथा सबैलाई प्रभावित तुल्याएका थिए । शिक्षिका रन्जु आचार्यले अध्यापन गर्नुभएको सानो कक्षाका विद्यार्थीहरूलाई अर्की शिक्षिका सुनीता पौडेलले प्रमाणपत्र वितरण गर्नुभएको थियो । त्यस्तै धन पौडेल र र गीता भूसालले अध्यापन गर्नुभएको मध्यम कक्षाका विद्यार्थीहरूलाई वहाँहरूबाटै प्रमाणपत्र वितरण गरिएको थियो ।
यसैगरी माथिल्लो कक्षामा अध्यापन गर्ने हरिभक्त आचार्य र प्रतिभा शर्माले पनि आफ्ना विद्यार्थीहरूलाई प्रमाणपत्र वितरण गर्नुभएको थियो ।
कार्यक्रममा स्वयंसेवकहरूलाई पनि प्रमाणपत्र प्रदान गरिएको थियो । यसक्रममा स्वयंसेवक सुनिका रेउलेलाई अनेसास कोलोराडोका उपाध्यक्ष निर्मला अर्यालले, विनिता अधिकारीलाई सल्लाहकार विजयदेव अधिकारीले र श्वेतमा आचार्य र मान्यता रूपाखेतीलाई सल्लाहकार धन पौडेलले, माया ज्ञवालीलाई डा. विजयराज शर्माले र उत्तम रेग्मीलाई प्रमिला शर्माले प्रमाणपत्र बाँड्नु भएको थियो । सबै शिक्षक शिक्षिकालाई अनेसास कोलोराडो शाखाका अध्यक्ष किरण अधिकारीले प्रमाणपत्र बाँड्नुभयो ।
कार्यक्रममा छोटो मन्तव्य राख्नेमा शिक्षक हरिभक्त आचार्य हुनुहुन्थ्यो, जसले पाठशाला सञ्चालनमा परेका समस्या र भावी दिनका लागि रचनात्मक सुझाव पनि दिनुभयो । पाठशाला संयोजक धन पौडेलले समयको कमीका कारण धेरै गर्न नसके पनि आत्म समीक्षा गर्दैभविष्यमा अझ राम्ररी संयोजन गर्न सकिने जानकारी दिनुभयो । अन्तमा, अनेसास कोलोराडो शाखा अध्यक्ष किरण अधिकारीले मन्तव्यसहित जानकारी दिनु हुँदै सहयोगी र सहभागी सबैलाई धन्यवादका साथ कार्यक्रमको समापन गर्नुभयो ।
कुल करिब ६० जना शिक्षक विद्यार्थी र अभिभावकसमेतको उपस्थिति भएको यस कार्यक्रममा दीक्षित बालबालिका सबैलाई हार्दिक बधाई ज्ञापन गरिएको थियो । बुबाको मुख हेर्ने दिनको सन्दर्भमा बुबा ऐश्वर्यधर शर्माको स्मृतिमा प्रतिभा शर्माले पाठशालाका लागि १०१ डलर सहयोग उपलब्ध गराउनुभएको थियो । खाजा सौजन्यमा पिज्जा सरोज भुषाल, फ्राइज र नगेट्स बसन्त लम्साल तथा चिया कृष्ण थापाले सहयोग स्वरूप प्रदान गर्नुभएको थियो । त्यस्तै, फोटो तथा भिडियो सौजन्य दिने साकार थापा लगायत सहयोगी सबै पाठशालाप्रेमीलाई अभार प्रकट गरिएको थियो ।
प्रतिक्रिया दिनुहोस्