कविता: घर

-आर. आर. चौलागाईं-
जुन घरमा मेरो पसिना बगेको छ
जुन घरमा मेरो रगत बगेको छ
त्यही घरमा तिमी मलाई नआउनु भन्छौ ।

त्यो घर तिम्रो मात्रै होइन
त्यो घर मेरो मात्रै होइन
त्यो घर हामी सबैको हो
त्यही घरमा तिमी मलाई नआउनु भन्छौ ।

जुन घरको लागि
मेरो जीवनसाथीको जीवन सिद्धिएको छ
जुन घरको लागि मेरो सिउँदो पुछिएको छ
जुन घरको लागि मेरा छोरीहरूको रहर
खरानी भएको छ
त्यही घरमा तिमी मलाई नआउनु भन्छौ ।

त्यो घर यो देशको भविष्य हो
त्यो घर नेपाली जनताको सपना हो
त्यो घर मेरो पनि आँसु पुछ्ने आधार हो
त्यही घरमा तिमी मलाई नआउनु भन्छौ ।

-हेटौंडा, मकवानपुर ।