कोलोराडोका दिदीबहिनीहरूले बरिष्ठ अभिनेत्री बसुन्धरा भुषालसंगै खाए तिजको दर

-नातिबाबु भट्ट (कोलोराडो अमेरिका) । हिन्दु महिलाहरुको महान चाड तिज नजिकिदै गर्दा कोलोराडो निवासी दिदीबहिनीहरुले बरिष्ठ अभिनेत्री बसुन्धरा भुषालको सहभागितामा सामुहिक रूपमा तिजको दरखाएका छन् ।

प्रवासमा रहेका महिला दिदी बहिनिहरुलाई एक्लो भएको महसुस हुन नदिन र सबै दिदी बहिनी एकै ठाउमा जम्मा भई सुखदुःख साटासाट गर्दै माईतीको झल्को मेटाउन सिष्टर्स ग्रुप दिदी बहिनी समूह कोलोराडोले आयोजना गरेको सामुहिक दरखाने कार्यक्रमा बसुन्धरा भुषालको सहभागिता भएको हो ।

कोलोराडो स्थित वेष्टमिनिष्टर सिटीमा आइतबार सांझ ५ बजे देखी राती १० बजेसम्म संचालन भएको तिजको दरखाने कार्यक्रममा संघ संस्थाका प्रतिनिधी बुद्धीजिवी, गन्यमान्य, समाजसेवी, ब्यवसायी तथा नेपाली भाषी बुबाआमा , दिदीबहिनी दाजुभाईहरुको बाक्लो उपस्थिती रहेको थियो ।

कार्यक्रमको शुरूमा सिष्टर्स ग्रुप दिदी बहिनी समुहका अध्यक्ष धन पौडेलले उपस्थित सबैलाई स्वागत गर्दै कार्यक्रमको उद्धेश्य बारे प्रकाश पारेकी थिइन । त्यसैगरी उनले सयौं दिदीबिहनीहरूको माझ आजैको मितीदेखी संस्थाको उपाध्यक्ष शान्ती भुषाललाइ अध्यक्षको कार्यभार हस्तान्तरण गरिएको घोषणा गरेकी थिइन् ।

कार्यक्रममा नेपाली कलाकारिताको क्षेत्रमा ६ दशक भन्दा बढी निरन्तर सकृय रहेकी बरिष्ठ हास्य अभिनेत्री बसुन्धरा भुषाललाइ कोलोराडोका सम्पूर्ण दिदीबहिनीहरूको तर्फबाट सिष्टरग्रुपका पदाधिकारीहरूले ढाकाको पछ्यौरा ओढाइ फुलका गुच्छा सौभाग्यको सामग्री प्रदान गरी सम्मान गरेका थिए ।

यसैगरी माइतीका तर्फबाट कोलोराडो नेपालीभाषी समुदायका अभिभावक नारायण श्रेष्ठ र उहाँको धर्मपत्नी सृजना श्रेष्ठले हिन्दु महिलाहरुको महान चाड तिजको उपलक्ष्यमा सबैलाइ सुभकामना दिएका थिए ।

कार्यक्रमलाई सम्बोधन गर्दै अभिनेत्री भुषालले प्रवासमा रहेरपनि हाम्रो भाषा संस्कृती जोगाइ राख्न जम्मा हुनु भएका यती धेरै दिदीबहिनी बिच उपस्थित हुन पाउँदा ज्यादै खुसीलागेको भन्दै सबैलाइ तिजको शुभकामना दिएकी थिइन् । उनले हाम्रो देश नेपालको पहिचान भनेको नै हाम्रो विविध भाषा र संस्कृती हो । यसलाइ जेगाएमात्र हाम्रो पहिचान रहने भएकोले यसलाइ जोगाइ राख्न सबैलाइ अग्रह गरिन ।

दरखाने कार्यक्रमलाई थप मनोरञ्जन प्रदान गर्न राफल चिट्टा समेत ब्यवस्था गरिएको थियो । जसमा राफल चिट्टा प्राप्त गर्ने दिदी बहिनीहरूलाइ साडी, श्रृंगारका सामग्री तथा नगद पुरस्कार प्रदान गरिएको थियो । त्यसैगरी कार्यक्रमलाई सफल बनाउन आर्थिक सहयोग गर्ने सहयोगी संघ संस्था तथा दाताहरुको नाम पढेर सुनाइएको थियो ।

सिष्टर्स ग्रुप सन् २०१७ देखी कोलाराडोका दिदी बहिनीहरु संगठित भएर बिभिन्न सामाजिक, सांस्कृतीक कार्यक्रमका लागी आवश्यकता अनुसार आर्थिक सहयोग संकलन र हस्तान्तरण तथा महिला हकहित जस्ता सामाजिक कार्यका लागी निरन्तर अग्रसर हुँदै आएको संस्था हो ।

यसरी कार्यक्रममा उपस्थित दिदी बहिनीहरुले तिजका गीत गाउँदै, नाचगान गर्दै आफैले बनाएको सेलरोटी, दहि लगायतका स्वादिष्ट भोजनहरु खादै एक आपसमा शुभकामना साटासाट गरी तिज मनाएका थिए ।